كان الاول الايجنت يفضل يهدهد ويطبطب ويغني اغاني قبل النوم للعميل عشان العميل مايحطش العقدة ف المنشار وينطق الجملة الشهيرة : اديني يابني السوبرفيزر اللي عندك ##!
والجملة دي بالنسبة لاي ايجنت إهانة بالغة تعادل اهانة الاتهام بالتبول اللا ارادي ...العميل من دول يقول الكلمة دي... وتترجم ف ودن الايجنت : اديني ياد حد كبير من عندك بلاش لعب عيال .
ساعتها الايجنت يطأطأ راسه ويجر اذيال الخيبة ويحط العميل على الهولد ويلف على حد ياخد الكومبلين ... وكان اللي بيروح للتيم ليدر بكومبلين كأنه بالظبط هنادي رايحة بطفل الخطيئة لابوها الحاج...لو الايجنت بنت... عادة الموضوع مقبول لانها مهما كانت بنت برده ومكسورة الجناح ويجوز العميل يسمعها كلام قبيح لو كترت معاه ف اللت والعجن , انما لو الايجنت ولد وجاي بكومبلين ... بيتبص له بنظرات كلها تشفي وقرف ...كأن بيتقال له :
مش عيب عليك شحط وسرتيفيد وان ايه واس ايه وابصر ايه ومدرك ايه ومش عارف تهندل حتة عميل...الله يخرب بيت التيست كينج ع الباس فور شور. ...قال يعني .!!
دلوقتي الوضع يختلف تماما ...مافيش عميل عنده حق الكومبلين لاننا بالفعل بنقدم اقصى خدمة ممكن تقديمها ... جبنا اولها عن اخرها خلاص ...ولا سبعين ف المية ولا تسعين ف المية ولا كلام الاعلانات ده, احنا ولا مؤاخذة نجحنا وجبنا مجموع يدخلنا طب عين شمس مرتاحين ....والمشرحة – على عكس المعتاد - ناقصة قتلة وعندنا عجز ف الجثث المنتحرة ف ظروف غامضة لزوم المذاكرة .
هنا مهمتك كايجنت تختلف ...ف العميل اللي يهفه الشوق ويتذمر بأسلوب متعالي على الشركة ... كانه وقع ومحدش سمى عليه ... واجبك تنبهه الاول انه دخل على مرحلة حرجة في حياته ولو الانترنت بيمثل له حاجة كبيرة ... خليه يقول عليه يارحمن يارحيم
ف الاول ماتطاوعوش وحاول تختلق له أي اعذار عشان اللي جاي مش حلو علشانه ...مثال :
- هوه حضرتك مشترك جديد معانا ....اه علشان كده بتخطرف ف الكلام كتير يافندم .
وتبتدي تفهمه واحدة واحدة انه هيتحاسب على كل كلمة هيقولها ف حق الشركة اللي مقطعة البحر كابلات كابلات ...وانه هيلف يلف ويرجع زي الــــ...... ولا بلاش .
غالبا ممكن ياكبدي يكون مشكلته في خط التليفون نفسه الذي لايصلح مش لتوصيل اشارة دي اس ال ده ولا حتى لتوصيل اشارة ووكي توكي ... ساعتها تفهمه يعني ايه المصرية للاتصالات :
- حضرتك بتشوف اعلانات المصرية للاتصالات ... مش بتسمعهم حضرتك بيقولوا شبكة واحدة بتقربنا كلنا ...انا افسر لك الشعار ده يعني ايه ... اولا (شبكة)المقصود بيها المصطلح البحري او الكروي ماتفرقش كتير ... فالشبكة عامة حاجة مخرمة ...يعني بتسرب... وده الوضع الطبيعي وماينفعش نلوم على خط طلع فلته بيسرب... لان ببساطة هي دي القاعدة ...
- ثانيا (واحدة) لانك مش هتعرف تجيب خط من براها الا لما تكون واخد وصلة من اسرائيل مثلا لحد البيت وده مستحيل طبعا , بس تأكد انك لو عرفت تعملها... محدش يستجري يبلغ عنك لانك عميل عندنا واحنا برده ستر وغطى وعلى بعض .
- ثالثا (بتقربنا) ...وماقالوش بتقربنا من ايه...طبعا ماقالوش عشان الحدق يفهم... بتقربنا م الاخرة يافندم ...م الانتحار يعني ...وده طبعا ولا عمره هيحصل ولا يكون
- رابعا( كلنا) يعني انت وانت ...ورقصنا يا جدع...كلنا ف الشبكة يافندم زي السمك ومادمنا كلنا تحت رحمتها يبقى مش لازم ناكل ف بعض ..لو ف البحر كنت قلتلك ماشي..وماتنساش ان السمك الصغير هوه اللي بيتاكل فاهمني طبعا يافندم.
اما ولو الغلطة البشعة ان العميل دافع الاشتراك والسيستم حب يخنصر وقفل عليه ...برده مابنتهزش ... ولا هيعرف يفتح بقه ...الايجنت الشاطر هوه اللي يعرف قيمة المكان اللي هوه شغال فيه .
- حضرتك بتقول ايه يافندم ...معلش حضرتك احنا مش محتاجين الخمسة واربعين ملطوش اللي بتمنَ علينا بيهم كل شهر عشان بعد ماتدفع نوقفلك الخدمة ... دي غلطة والغلط مردود يعني ... اصبر لما المبيعات تفتح الصبح وجعجع براحتك ...مش عشان احنا مرزوعين اربعة وعشرين ساعة تقوم تتصل تتنطط علينا وتعمل الشويتين دول حضرتك.
وممكن يكون طالب تحصيل والمحصل نفض له ... برده انت مالاكش فيه :
- المحصل ده حضرتك بعجلة بيمسك منطقة منطقة يلم الاشتراك ودي حاجة مرهقة لأي حد , خصوصا انه بيضطر لأساليب مقدرش اقول لحضرتك عليها لو ما لقاش العميل ف الميعاد موجود ... يعني تحمد ربنا انه ماجالكش وحضرتك ف مشوار ولا ف الحمام ... ثانيا هوه ده نظام التحصيل عندنا واظن بتقول دي مش اول مرة المحصل يسقع على حضرتك ...لما انت النت خلاص هوه الشريان اللي بيغذي الحنجرة اللي فاتحها علينا ... حضرتك هز طولك وتعالى ادفع ف أي فرع...بلاش ... ابعت عيل من عيالك ولا حتى البواب وشبرق عليه باللي كنت هتديه للمحصل ...محلولة يعني يافندم بس تقول ايه بقى ...مصريين.
