الحلقة الاولى : شكرا لاتصالك بالدعك الفني

الزمان : زي الايام دي او قبل كده بشوية او بعدها بحبتين ..ماتفرقش غير مع اللي ربنا كرمه ونقل قسم تاني

المكان : كول سنتر تبيكال زي اللي انت متلقح فيه بس على الطف كتير..!!

ليه ألطف ؟

لانه بسيط ...محدش يقولك انزل بالليل فورمال ولا سايب العميل ع الهولد نص ساعة ليه ... والبريك ليتينسي بيتحسب بعد اول نص ساعة تمر من انتهاء البريك الساعة الا ربع .

عاوزين تعرفوا الوضع عندنا وصل للدرجة دي ازاي ؟ بسيطة خالص

العملا قاعدين يزيدوا بنفس معدل الزيادة السكانية ...كأن كل عيل بيتولد بيحتاج امر شغل

والمشاكل فضلت تزيد بالرغم من جميع محاولات الادارة انها تدرب الايجنتس بتوعها ....ضيعوا فلوسهم كلها ع التدريب ياولداه ...دون الاخذ في الاعتبار ان التدريبات المطلوبة في مرحلة الضغط على الكيو هي مهارات معاملة الاطفال ومن ثم معاملة المعاقين ذهنيا مرورا بمعاملة خريجي السجون والمجرمين بالفطرة الى ان تصل لاقصى مستوى احترافي لاداء العمل وهو الجزء الخاص باقناع العميل بعدم الانتحار وان الحياة مش هتقف على قطع النت و ان الرضا بالمقسوم وعدم السخط على اسلوب الحياة و متطلبات العصر..!!

ولا مانع في هذه الحالة استخدام بعض العبارات المؤثرة لانهاء المكالمة دون سماع العميل وهو يشعل النار في نفسه او تلاقي السماعة وقعت من ايده وصوت ناس بتجري وصويت وياحبيبي يابني ...ومنكم لله ياا ظلمة والحقوني بالاسعاف الواد هيروح منّي...كده الشركة هتفلس بسبب معظم الخطوط الموجودة بقت لمرضى نفسيين وورثة المرحوم اللي على الاوردر.

من هنا جاءت نصائح الكواليتي ببعض العبارات التي قد تساعد على الهندلة وتقليل الاصابات اثناء المكالمة ومنها :

–الانسان طماع بطبعه يافندم بس ما يتهيأليش انك حضرتك من النوعية دي خالص.

- حضرتك يافندم مؤمن بربنا ...وممكن تكون بتصلي كمان ....حضرتك صليت النهاردة .؟

وتروح ساحب العميل ف موضوع تاني خالص بأسلوب احترافي بحت لا يترك مجال للعميل في الاخذ بزمام المكالمة منك.

- حضرتك الفني اللي بينزل السنترال ده عنده عيال بيجري عليهم وحرام تشتكيه ان بعد سبع مرات تركيب الخط ما قامتلوش قومة ... خلي التامنة علينا وانا اقسملك بشرف المهنة انها هتكون اخر مرة. ( وطبعا اخر مرة دي معناها ان الفني يستحيل يمد ايده ف البورت ده لانه اولا ممكن يكون مسكون بالارواح الشريرة ثانيا لانه بقى اوسع من فتحة كرسي الحمام من كتر الاسبليت .

وللكواليتي حلقة خاصة لان التعاطف مع العميل بقى اهم النقاط اللي هيتركز عليها وانت بتتسمعلك مكالمة ...لو ماعيطتش بالشكل المناسب للمشكلة والدمعة فرت من عنيك مع صوت نف وتف وحبشتكنات العميل لازم يسمعها الشيت بتاعك هيجي وهتلاقي في الريبورت كلام مش لطيف زي :

-قلبه زي الحجر ومعندوش دم ولا احساس ....

الشحتفة ماكانتش بدرجة مناسبة المشكلة حيث ان العميل بقى له تلات سنين يوتيلايزد وباد لاين كواليتي وبالتالي انستيبول وبيحتاج ريستارت للبورت بمعدل ثمان مرات ف اليوم.

-اسم الدلع بتاع العميل ما اتقالش ولا مرة اثناء المكالمة مما قد يعكر مزاجه على الشركة.

تقدر تقول ان موضوع الكواليتي اتحل تماما ...لان من الوقت ده مافيش كواليتي .....انت الكواليتي...

وبعد تطوير وسائل الهندله بالكول سنتر وتلميع الواجهة التي تتلقى الضربات بالنيابة عن جميع العاملين بالمنظمة قررت الشركة تطوير الحملة الدعائية تضامنا مع المجهود المبذول من متلقي المكالمات ...اختارت الشركة شعار جديد للحملة وهو :...وصل م الكابل الرئيسي

الشعار كان مفيد جدا...لتقليل ترديد العبارة ذاتها واللي ممكن تسمعها من العميل نفسه قبل ما يقول اسمه كانها تعويذة شيطانية هي اللي هتحل له مشكلته مع الشركة ....مش يسمي الله احسن .

الاجواء الداخلية بقى ليها طبع وسمة اخرى تماما عن المتداول عنها بالشركات الاخرى...فكل قسم اختار الاسم الذي يعبر عن طبيعة عمله ولكن بشرط عدم استخدام هذا المسمى خارج نطاق الشركة وعلى سبيل المثال :

_قسم الدعك الفني (ده لان الكيو بيدعك الايجنت ولما العميل بيوصل للايجنت بيدعك العميل لحد مايبان اصحاب)

- قسم الاتاوة والجزية واللي مايشتري يتبهدل. ( انصحك ماتسألش اساليب التحصيل بقت صعبة ازاي !!)

- قسم خدمة العولا ( جمع عويل وهو كل من لم يستطع ان يأخذ حقه بدراعه)

- قسم الخيار والكوسة : ... وده مكالمته لا بتتسجل ولا بتتسمع ليس لانه بيتعامل مع الجهات الجامدة والناس الواصلة وضمان السرية والكلام الهجص ده ... ولكن لان العميل اللي اتنقل من الدعم العادي للقسم ده بعد ماسمع عنه ...يظل يفرج عن نفسه بعبارة واحدة فقط طوال المكالمة وهي : بفلوسي يا كلاب...#!

يتبع>